Heb 4 | TUCO | STEP | Tovenen Maaron imbua saveeŋ toman tamtoghon toni ighaze ye pale igham di atedi izi. Ve saveeŋ mbuaaŋ tonowen inepneep sone. Tovenen iit irau tamatughez ve mataad iŋgal tauud pooi. Pasa, ighaze tiam eta itaghon ataam to Krisi ila, eemoghon ipasob laghooŋ toni maau, ve imuul izi ataam luvuŋa moghon, nene pale irau ighita saveeŋ mbuaaŋ tonenen anoŋa maau.

bHib 3:14

cMt 11:28

dMbo 95:11; Hib 3:11

eMbnp 2:2+

fMbo 95:11

gMbo 95:7+

hYos 22:4

iSyg 14:13

jEp 6:17; Syg 1:16

kMbo 33:13+, 139:1+; 2Kor 5:10

lHib 3:1, 6:11, 10:35+

mMt 4:1+; 2Kor 5:21; Hib 2:17; 1Pe 2:22; 1Yo 3:5

nEp 3:12; Hib 10:19+

Hebrews 4

Maaron imbua saveeŋ toman tamtoghon toni ighaze ye pale igham di atedi izi

1 Tovenen Maaron imbua saveeŋ toman tamtoghon toni ighaze ye pale igham di atedi izi. ^{▼▼(4:1) Nepooŋ to ateed izi to Maaron igham pa tamtoghon toni, nene ŋgara tol 1) Muuŋ, Maaron igham yes Israela tilooŋ tila taan Kanaan, leso tigham taan tonowen inim ledi ve tineep pooi 2) Aazne, Krisi igham ghiit ateed izi pasa, iit irau tanumeer uraat ve poia toni pa igham ghiit taneep deŋiaad ila Maaron mata 3) Muri, Maaron pale igham tamtoghon toni tila ndug sambam, leso atedi izi ve tineep pooi.}

Ve saveeŋ mbuaaŋ tonowen inepneep sone. Tovenen iit irau tamatughez ve mataad iŋgal tauud pooi. Pasa, ighaze tiam eta itaghon ataam to Krisi ila, eemoghon ipasob laghooŋ toni maau, ve imuul izi ataam luvuŋa moghon, nene pale irau ighita saveeŋ mbuaaŋ tonenen anoŋa maau. ^b

2 Onoon, tivotia varu poia pait ve talooŋa wa, inimale muuŋ ival tiina to Israel tilooŋ Maaron aliŋa. Eemoghon saveeŋ tonowen iuul di maau. Pasa, sawa to tilooŋa, tighur ila maau. 3 Aazne, iit tamtoghon to taghur ila to Krisi, tauto ye igham ghiit ateed izi. Ve yes to tighur ila maau ne, irau atedi izi maau. Pasa, Maaron isaav ighaze: ^c

“You nasaav ariaŋa padi toman ateg yabyab, ve napariaaŋ saveeŋ tiou naghaze:
‘Onoon kat. Ndug to naghaze atedi izi pani, yes irau tilooŋ tila maau. Maau le maau kat!’” ^d
Eemoghon sawa to ye igham ghiit ateed izi, nene inepneep sone. Pasa, muuŋ kat, sawa to Maaron ighur sambam ve taan, ye ipasob uraat toni le isob. Ve aazne, ye inamnaam ghiit. 4 Aghita. Saveeŋ toni waaro eez isaav ighaze: “Sawa inim liim ve ru, ghoro Maaron ate izi pa uraat toni to naol ne.” ^e

5 Ve saveeŋ waaro ite isaav tovene:

“Ndug to naghaze atedi izi pani, yes irau tilooŋ tila maau.” ^f
6 Tovenen saveeŋ mbuaaŋ to Maaron to isaav ighaze ye pale igham tamtoghon toni atedi izi, nene inepneep sone. Ve tamtoghon pida pale tighita saveeŋ tonenen anoŋa. Eemoghon yes to tilooŋ mbeb tonenen varu muuŋ, tighita anoŋa maau. Pasa, tizoor Maaron aliŋa. 7 Tauto Maaron ighur sawa ite pa igham tamtoghon toni atedi izi kat. Sawa tonenen, tauto aazne taza pani wa. Aghita. Ndaman katindi inim ila, ve muri ghoro, Maaron ivotia nepooŋ tonenen saveeŋa ila David avo ighaze:

“Aazne, ighaze yam alooŋ Maaron aliŋa, apoon lolomim pani malep.” ^g
8 Onoon, Yosua igham yes Israela tilooŋ tila taan Kanaan. Eemoghon ye igham di atedi izi kat maau. Pasa, inimale ye igham di atedi izi kat, tone irau Maaron isavia sawa ite paam to igham tamtoghon atedi izi ne maau. ^h

9 Tovenen nepooŋ to Maaron igham tamtoghon toni atedi izi kat inimale nepooŋ to umbom patabuaŋ, nene inepneep sone. 10 Ighaze Maaron igham tamtoghon eta ate izi, nene pale uraat toni isob, ve ate izi kat, inimale Maaron ighur sambam ve taan le isob, ghoro ate izi. ⁱ

11 Tovenen iit irau tazuaria ghiit kat le taneep ateed izi itaghon Maaron ŋgar toni. Pa vene, toit eta izoor Maaron inimale yes Israela, ghoro itap pa ghurla toni, ve irau igham nepooŋ tonowen maau.

Saveeŋ to Maaron, mata kat

12 Maaron aliŋa, nene saveeŋ mata yaryaara, ve ighamgham uraat toman tapiri tiina. Ve saveeŋ toni, mata kat. Ilib pa buza to mata ru. Tauto iŋgalŋgal katin lolood, ve ipatooŋ ŋgar to ineep ila lolood ne ivot ighazooŋ. Leso taghilaal ŋgar sine to ivot ila to Maaron Avuvu, ve ŋgar sine to ivot ila tauud ŋgar toit moghon. ^j

13 Maaron, ye mata mala. Mbeb to ye ighur di, eta iyooŋ pani maau. Mbeb ŋgozaaŋ tisob tineep tighazooŋ ila mata. Ve iit tasob pale tayoon ila ye mata, leso tavotia ŋgar to tagham di ne ila toni, ve iŋgabiiz ghiit. ^k

Yesu, ye daba tau to watooŋrau

14 Tovenen ghurla toit to tavovotia ne, takisi tuŋia. Pasa, iit leed daba tiina eez to watooŋrau. Nene Yesu. Ye Maaron tau Natu. Ye malmali iza ila le ila peria to Maaron to sambam we, leso igham avood ve isavia saveeŋ toit ila toni. ^l

15 Onoon, iit tamtoghon tapiriid imbool. Eemoghon daba toit to watooŋrau tonene, ye lolo isasamin ghiit. Pasa, tovaaŋ tisob to tivotvot pait ne, tivot pani paam, ve ye iwatag di wa. Eemoghon ye igham sosor eta maau. ^m

16 Tovenen iit tamatughez pa tala tagharau Maaron malep. Taghur suŋuuŋ toit iŋarua ina to ghamuuŋ pooz irau sawa isob. Pasa poia toni, nene tiina le tiina kat. Tovenen sawa to pataŋani igham ghiit, ye pale lolo isamin ghiit, ve iuul ghiit itaghon tau poia toni. ⁿ